တေးရေး စိုင်းခမ်းလိတ်နှင့် တွေ့ဆုံခြင်း 'ကျွန်တော်ရဲ့ခံစားချက်တွေ၊ အဖြစ်အပျက်တွေကနေ သီချင်းတွေရေးဖြစ်ခဲ့တာပါ'
စိုင်းထီးဆိုင်ဟု ဆိုလျှင်၊ တေးရေး စိုင်းခမ်းလိတ်ကို တွဲ၍မြင်လာသလို စိုင်းခမ်းလိတ်ဟု ဆိုလျှင်လည်း စိုင်းထီးဆိုင်၏ တေးသီချင်းဖြင့် ဖြည့်စွက်မှတ်မိနေကြစမြဲ ဖြစ်သည်။ ကိုယ်ပိုင်သံစဉ်များကို သဘာဝစကားလုံးများဖြင့် ဘ၀အကြောင်း၊ အချစ်အကြောင်းကို ဖွဲ့ဆိုထားသော သူ၏တေးစာသားများသည် ယနေ့လူငယ်ထုရင်ထဲတွင် တွယ်ခိုနိုင်ဆဲဖြစ်နေသည်။ ထိုအတွက်ကြောင့် တေးရေး စိုင်းခမ်းလိတ် ရန်ကုန်ရောက်ရှိခိုက် တခဏတာကာလ အတွင်း တွေ့ဆုံကာ လက်ရှိလုပ်ကိုင်နေမှုများ၊ တေးသီချင်းများနှင့် ယခင်ကာလ အမှတ်တရများကို ပြန်လည်မေးမြန်းခဲ့ မိပါသည်။
မေး - ဆရာ တောင်ကြီးမှာ ဘာတွေလုပ်ဖြစ်နေပါသလဲ။
ဖြေ - သီချင်းတွေရေးတယ်။ ရှမ်း သီချင်းတွေများပါတယ်။ ရှမ်းသီချင်းတွေကတော့ လာဝယ်ကြတယ်။ အဲဒါတွေလုပ်ဖြစ်နေတယ်။
မေး - ရှမ်းပြည်နယ်မှာက ရှိုးပွဲတွေလုပ်ကြတာ များတယ်လို့ ကြားရတယ်။ ဒါပေမယ့် ရှမ်းပြည်နယ်မှာ ထင်ရှားတဲ့အဆိုတော်တွေက ဘာကြောင့် မြန်မာစာသားနဲ့သီဆိုဖို့ စိတ်မ၀င်စားကြတဲ့အပေါ် ဆရာဘယ်လိုထင်မိပါသလဲ။
ဖြေ - ရှမ်းပြည်နယ်ရော နယ်စပ်မှာရော ပွဲတွေလုပ်နေကြတာပါပဲ။ ဆိုတာကတော့ ရှမ်းသီချင်းတွေများတယ်။ အဲဒီအတွက် ကျွန်တော့်ရှမ်းသီချင်းတွေ ရောင်းနေရတာပေါ့။ တစ်ခွေစာတော့ မဟုတ်ဘူး။ တစ်ပုဒ်၊ နှစ်ပုဒ် လာဝယ်ကြတာပေါ့။ ရှမ်းပြည်နယ်မှာတော့ နန်းဆာရာ တို့ဘာတို့ နာမည်ကြီးပါတယ်။ ဒါပေမယ့်ပွဲတွေက ဟိုမှာဆက်တိုက် တင်ဆက်နေတော့ ဒီဘက်မှာ မဆိုဖြစ်တာလည်း ပါမှာပေါ့။
မေး - ဆရာ့အဖေက ရှမ်းစာဆိုကြီး တစ်ယောက်လည်း ဖြစ်တယ်ဆိုတော့ အဖေရဲ့တေးစာသားတွေက ဆရာအတွက် ထောက်ကူမှု ဖြစ်စေခဲ့ပါသလား။
ဖြေ - အဖေတို့ရေးတဲ့စာတွေက ပရပိုက်စာလိုမျိုးတွေ ဆွဲပြီးဆိုနေရတာ။ နေ့စဉ်နဲ့အမျှတော့ ကြားနေရတာပေါ့။ ဒါပေမယ့် ကျွန်တော်က ပြင်ဦးလွင်က စိန့်ဘတ်ကျောင်းမှာ တက်ခဲ့တာဆိုတော့ အဲဒီအချိန်တုန်း ကဘီတဲလ်တို့ ရှဲဒိုးတို့ခေတ်ပေါ့။ ကျွန်တော်က ဘယ်လောက်အထိ ကြိုက်လည်းဆို ဘီတဲလ်ဆံပင်အတိုင်း အဲဒီအချိန်တုန်းက ထားခဲ့တဲ့လူဖြစ်တော့ ဘီတဲလ်သီချင်းတွေ ပဲနားထောင်ဖြစ် ရေးဖြစ်ခဲ့တယ်။
မေး - ဒါပေမယ့် ဆရာရဲ့သက်တမ်းတလျှောက် ပရိသတ်ရှေ့ချပြခဲ့ ထွက်ရှိခဲ့တာတွေကတော့ ကိုယ်ပိုင်သံစဉ်တွေပဲ ဖြစ်ခဲ့တာက . . .
ဖြေ - ကျွန်တော်လည်း ကော်ပီ ရေးခဲ့တာပဲဗျ။ ၁၉၆၅ ၀န်းကျင်ပေ့ါ။ ရေးခဲ့တာမှ စီးရီးလေးခွေစာလောက်ကို ရှိတယ်။ ဒါပေမယ့် ပြကြည့်တော့ လက်မခံကြဘူး။ ကျွန်တော်တောင် စဉ်းစားတယ် ရှမ်းတွေက တော်တော်အဆင့် မြင့်နေကြပါလားတောင် တွေးမိတယ်။ တစ်ကမ္ဘာလုံးကြိုက်တဲ့ သီချင်းတောင် လက်မခံပါလားပေါ့။ ဒါနဲ့ ၁၉၆၆ မှ ကိုယ်ပိုင်သံစဉ်ကို စပြီးရေးတယ်။ ပထမဆုံးရေးတာက ရှမ်းလိုပဲ။ အိပ်မက်ထဲကချစ်ရသူ။ အဲဒီမှာ အထိုက် အလျှောက် လူသိသွားတယ်။ နောက်ပိုင်းဒီသီချင်းကို ကေဇင်လတ်က ပြန်ဆိုတယ်။
မေး - ကိုယ်ပိုင်သံစဉ်စီးရီးကိုရော ဘယ်အချိန်ရောက်မှ စထုတ်ဖြစ်နိုင်ခဲ့တာလဲ။
ဖြေ - အဲဒီလိုနဲ့ လေးနှစ်လောက် ကိုယ်ပိုင်သံစဉ်တွေရေးတယ်။ အဲဒီ အချိန်တုန်းကရေးတာ ရှမ်းလိုပဲ။ ၁၉၆၈ ရောက်မှ မြန်မာစာနဲ့ကိုယ်ပိုင် သီချင်းသုံးပုဒ်ရေးတယ်။ ဒီတစ်ခါတော့ ကျွန်တော်ကလည်နေပြီ။ တခြားလူတွေကိုမပြတော့ဘူး။ နမ့်တူ ကိုပြန်ပြီး ပြည်တော်သာရုပ်ရှင်ရုံရှေ့မှာနေတဲ့ ကျွန်တော့်မိတ်ဆွေ စိုင်းအိုးပြည့်ခြံထဲကနေ အော်ဆိုပြတယ်။ ကြိုက်တဲ့သူရှိရင် ၀င်လာလိမ့်မယ်ပေါ့။ တကယ်ပဲ အဲဒီမှာဝင်လာပြီး စီးရီးတွေ လုပ်ဖြစ်သွားတာပါ။
မေး - ဆရာသီချင်းတွေက ဆရာ့ဘ၀ရဲ့တစိတ်တပိုင်းလို့ ပြောတာကြားဖူးပါတယ်။ အဲလို သတ်မှတ်ရင်ရော ရနိုင်မလား။
ဖြေ - ဟုတ်ပါတယ်။ ကျွန်တော်ခံစားချက်တွေ အဖြစ်အပျက်တွေကနေ သီချင်းတွေရေးဖြစ်ခဲ့တာပါ။ ဥပမာ ခြင်္သေ့လည်ပြန်'ဆို တစ်ညနေဗိုက်ကြီးနေတဲ့ ကျွန်တော့်ဇနီးနဲ့အိမ်ပြင်ထွက်ကြတော့ မိုးလေးကလည်း ဖွဲဖွဲ ရွာနေတယ်။ ဗိုက်ကြီးသည်ဆိုတော့လည်း ချဉ်ခြင်းတက်ရှာတယ်။ ဒါပေမယ့် ကျွန်တော့်အိတ်ထဲမှာရှိတာဆိုလို့ ၅၅ ပြားပဲရှိတယ်။ အဲဒါနဲ့အပြင်ကပြန်လာပြီး ကုတင်ဘေးမှာသူက ခွေခွေလေးလှဲနေတယ်။ အဲဒီမှာသူ့ ကိုကြည့်ပြီးသနားသွားရင်းကနေ ဒီသီချင်းဖြစ်လာတယ်။ အဲလိုမျိုးပေါ့။
မေး - အဲဒီအချိန်မှာ ဆရာကသီချင်းတွေ ရေးနေရပေမယ့် ကိုယ့်ဘ၀ကိုထောက်ပံ့မှုတော့ မဖြစ်သေးတဲ့အနေအထားလား။
ဖြေ - ရန်ကုန်မှာတော့မသိဘူး။ ကျွန်တော်တို့ဆီမှာက ပိုက်ဆံပေးရမယ် ဆိုတာမျိုးမရှိဘူး။ ကိုယ်စားချင်တာ ၀ယ်ကြွေးလိုက်တယ်ဒါမျိုးပဲ။ ပိုက်ဆံရယ်လို့မရှိဘူး။ ငါးဆယ် တစ်ခါပဲရတယ်။ နောက်မန္တလေး ရောက်ပြီး အမေ့ကို မန္တလေးခေါ်ချင်တုန်းက သူငယ်ချင်းတစ်ယောက် အကူအညီနဲ့တစ်ရာနဲ့ ရောင်းဖြစ်ခဲ့တယ်။
မေး - ဆရာက ကိုယ့်ရုပ်ရည် အပေါ်ယုံကြည်မှုမရှိခဲ့လို့ သီချင်းတွေလူကြိုက်ပါ့မလားဆိုတဲ့ သံသယရှိခဲ့ပေမယ့် ဦးထီးကိုရော ဘယ်လိုအချက်ကြောင့် ယုံကြည်ချက်လက်ခံခဲ့တာလဲ။
ဖြေ- ကျွန်တော်က ရုပ်လည်းမချောဘူး၊ သွားကလည်းခေါတော့ ပရိသတ်လက်ခံပါ့မလား စိုးရိမ်ပြီး ကျွန်တော် အစ်ကို လောင်းရိပ်မှာနေခဲ့ပါတယ်။ ဒါပေမယ့် ထီးဆိုင်နဲ့ကျတော့ သူ့ကို ကျွန်တော်ဆိုခိုင်းကြည့်တယ်။ အဆင်ပြေတဲ့အတွက် သူနဲ့လက်တွဲဖြစ်တယ်။ အသံကိုပဲ အဓိကနားထောင် ကြည့်ခဲ့တယ်။ သူနာမည်ကြီးနေတုန်းကတောင် သွားပြင်ဖို့ပြောသေးတယ်။ ကျွန်တော်က ပြင်ချင်ရင်တော့ ပြင်ပေါ့။ ဒါပေမယ့် မင်းသွားအသစ် က ဒီလိုအသံမျိုးဖြစ်ပါ့မလား ပြောတာနဲ့ မပြင်ဖြစ်တော့ဘူး။
မေး - ဆရာသီချင်းအချို့ကို ယနေ့လူငယ်ကြိုက်ပုံစံနဲ့ အပြောင်းအလဲလုပ်ကြတဲ့အပေါ်မှာ ဘာများပြောချင်ပါသလဲ။
ဖြေ -ကောင်းပါတယ်။ သူ့ခေတ်နဲ့သူ ပေါ့ဗျာ။
အခုကျနော်တင်ပြခဲ.တဲ.အင်တာဗျူးကို weekly eleven အင်တာနက်စာမျက်နှာမှကူး ယူဖေါ်ပြပါသည်။
ဆရာစိုင်းခမ်းလိတ်ရဲ.သီချင်းတွေအတော်များများကိုကြိုက်ခဲ.တဲ.ပရိတ်သတ်တစ်ယောက်အနေနဲ.
တခြားသောကြိူက်တဲ.သူတွေကိုမျှဝေချင်တဲ.သဘောပါ......
ကျနော်ကြိုက်တဲ.သီချင်း များထဲကနေ ပြီးတော.မှ “အချစ်အတွက်တဖန်မွေးဖွားခြင်း” ဆိုတဲ.သီချင်းလေးကို
နားဆင်ကြပါလို.
No comments:
Post a Comment